प्रचण्डको निर्देशनमा कुलमानको कार्यकाल थप्न मन्त्रिपरिषद् बैठकमा प्रस्ताव जाने

खबर मेरो ३ बर्ष अगाडि

काठमाडाैं । नेपाल विद्युत प्राधिकरणमा दुई वर्षका लागि कुलमान घिसिङलाई नियुक्ति गर्न मन्त्रिपरिषद् बैठकमा प्रस्ताव जाने भएको छ ।

नेपाल कम्युनिष्ट पार्टी (नेकपा)का अध्यक्ष प्रचण्डको निर्देशनमा उर्जामन्त्री वर्षमान पुनले कुलमानको कार्यकाल थप्न मन्त्रिपरिषद्मा प्रस्ताव लैजाने भएका हुन् ।

यसअघि नै सार्वजनिक रुपमा कुलमानको कार्यकाल थपिने अभिव्यक्ति दिएका उर्जामन्त्री पुनले प्रचण्डको निर्देशनमा प्रस्ताव लैजान लागेको स्रोतले जनाएको छ ।

बिहिबारको मन्त्रिपरिषद्म बैठकमा कुलमानको कार्यकाल थप गर्नेबारे प्रस्ताव लैजान उर्जा मन्त्रालयले सम्पूर्ण तयारी अन्तिम चरणमा पुर्‍याएको स्रोतले जनाएको छ । खुल्ला प्रतिष्पर्धाबाट नेपाल विद्युत प्राधिकरणको कार्यकारी निर्देशक बनेका कुलमानको कार्यकाल यहि २९ गते सकिदैछ ।

प्रचण्डले आफ्नो सरकारका पालामा कुलमानलाई प्राधिकरणको नेतृत्व सुम्पेका थिए । स्रोतका अनुसार प्रचण्डले कुलमानको नियुक्तिबारे प्रधानमन्त्री केपी शर्मा ओलीसँग समेत छलफल गरिसकेकाले भोलीको मन्त्रिपरिषद् बैठकमा प्रस्ताव जाने भएको हो ।

यता, उर्जामन्त्री पुन समेत कुलमानको कार्यशैलीबाट असन्तुष्ट रहेको स्रोतको दाबी छ । कुलमानले विद्युत शुल्क कटौतीको जस आफैं लिएको आरोप लाग्ने गरेको छ। सरकारले ल्याएको नीति तथा कार्यक्रम र बजेटबाट ल्याएको कार्यक्रममा समेत उनले जस लिन खोजेको भन्दै उनलाई दोहोर्‍याउनेमा सरकार झस्किएको जनाइन्छ ।

तर, कुलमानले लोडसेडिङको अन्त्य गरेर जनताबाट वाहवाही पाएको र कुलमानको पक्षमा जनलहर देखिएकाले सरकारको लोकप्रियतासँग जोडिन सक्ने भन्दै उनलाई पुनः दुई वर्षका लागि नियुक्ति दिने तयारी सरकारले गरेको हो ।