रमेश सिलवाल दोश्रो कार्यकालका लागि राखेप सदस्य सचिवमा नियुक्त

खबर मेरो ४ बर्ष अगाडि

काठमाडौं । राष्ट्रिय खेलकुद परिषद् (राखेप) सदस्य सचिवमा रमेश सिलवाल दोश्रो पटक नियुक्त भएका छन् । 

चार वर्षे कार्यकालका निम्ति सिलवाललाई मन्त्रिपरिषद् बैठकले नियुक्त गरेको हो । २०७६ असार २३ गते राखेपको १८ औं सदस्यसचिव नियुक्त भएका सिलवाल नयाँ खेलकुद ऐन कार्यान्वयनमा आएपछि गत असार १७ गते पदमुक्त भएका थिए । भने सिलवाल लगातार दुई कार्यकालका निम्ति राखेप सदस्य सचिवमा नियुक्त हुने पहिलो व्यक्ति समेत बनेका छन् ।

सोमबार बसेको मन्त्रिपरिषद् बैठकले सिलवाललाई सदस्य सचिवमा नियुक्त गरेको हो । सिलवाल पदमुक्त भएसँगै युवा तथा खेलकुद मन्त्रालयले सदस्य सचिव चयनका निम्ति मन्त्रालयका सचिव रामप्रसाद थपलियाको संयोजकत्वमा सिफारिस समिति गठन गरेको थियो ।

समितिले आदेवन दिएका मध्ये रमेश सिलवाल, नेकपा केन्द्रीय सदस्य लिलबहादुर थापा मगर र भलिबलका पूर्वखेलाडी अन्जु श्रेष्ठमध्येबाट सदस्य सचिव नियुक्त गर्न मन्त्रिपरिषदमा सिफारिस गरेको थियो ।

समितिले सिफारिस गरेकामध्ये मन्त्रिपरिषदले सिलवाललाई सदस्य सचिवमा नियुक्त गरेको युवा तथा खेलकुद मन्त्रालय स्रोतले जनाएको छ ।

सदस्य सचिव चयनपछि अब राखेप बोर्डमा सदस्यहरुको नियुक्ति प्रकिया पनि शुरु हुनेछ । नयाँ ऐन अनुसार राखेपको बोर्डमा अब ३७ सदस्यीय हुनेछ । जसको अध्यक्षमा युवा तथा खेलकुद मन्त्री रहनेछन् ।

नयाँ ऐन अनुसार अब सदस्य सचिवको एकल अधिकार ७ सदस्यीय कार्यसमितिमा बाँडिनेछ । उक्त कार्यकारी समितिको संयोजक सदस्य सचिव नै रहनेछन् भने सदस्यमा युवा तथा खेलकुद मन्त्रालयको खेलकुख महाशाखा प्रमुख सदस्यको रुपमा रहनेछन् ।

राखेप बोर्ड सदस्यमध्ये खेलकुद मन्त्री र सदस्य सचिवले दुई-दुई जना मनोनित गर्नेछन् । राखेपको प्रशासन विभाग प्रमुख भने उक्त समितिको सचिवको रुपमा रहनेछन् ।