ईश्वर पोखरेलका सम्धी बाणिज्य बैंकका अध्यक्ष, को हुन उनी ?

खबर मेरो ४ बर्ष अगाडि

काठमाडाैं । उपप्रधान एव्ं रक्षामन्त्री ईश्वर पोखरेलका सम्धी उपेन्द्रकुमार कोइराला राष्ट्रिय बाणिज्य बैंकको अध्यक्षमा नियुक्त हुने भएका छन् । 

सरकारी पूर्ण स्वामित्वको बैंकमा पोखरेलका सम्धी अध्यक्षमा नियुक्त हुन लागेका हुन् । 

कोइरालालाई मन्त्रिपरिषद् स्तरिय निर्णय गर्दै सोमबार बैंकको सञ्चालकमा नियुक्त गरिएको हो । बैकका अध्यक्ष रहेका निर्मलहरि अधिकारीलाई सरकारले राजस्व बोर्डमा पठाएर उनलाई बैंकको अध्यक्षमा ल्याउन लागेको हो । 

बैंकको अध्यक्षमा सञ्चालक समितिले निर्णय गर्ने प्रावधान रहेकाले बुधबार बस्ने सञ्चालन समितिको बैठकले कोइरालालाई अध्यक्षमा चयन गर्ने स्रोतले जनाएको छ । 

को हुन् कोइराला ?

कोइरालाको यसअघिका नियुक्ति र उनका कामहरु पनि विवादित छन् । उनको नियुक्ति पाउने क्रम २०५१ सालबाटै सुरु भएको हो । तत्कालिन नेकपा एमालेको सरकार हुँदा २०५१ सालमा खाद्य संस्थानको महाप्रवन्ध नियुक्त भए । खाद्य संस्थान पछि उनी महेन्द्र मोरङ क्याम्पसका क्याम्पस प्रमुखको नियुक्ति पाए ।

त्यसपछि पनि उनी खाली बस्नु, परेन एमाले सरकार बन्ने वित्तिकै उनले नियुक्ति पाइहाल्थे । पोखरेल वाणिज्य तथा आपुर्ति मन्त्री बनेका बेला कोइराला नेपाल आयल निगमको कार्यकारी अध्यक्ष नियुक्त भएका थिए ।

२०६२/६३ पछि कोइराला उच्च माध्यमिक शिक्षा परिषद्को उपाध्यक्षमा नियुक्त भएका थिए । त्यसबेला त उनी झन् विवादित भएका थिए ।

त्यसबेला गुणस्तरहीन उत्तर पुस्तिका खरिद गरेर भ्रष्टाचार गरेको भन्दै विवाद उत्पन्न भएको थियो । यो विषयमा सार्वजनिक लेखा समितिले छानविन गरेपछि उनले राजीनामा दिएका थिए ।

विवादमा मुछिए पनि कोइरालाले नियुक्ति भने पाइरहे । मध्यपश्चिमाञ्चल विश्व विद्यालयको उपकुलपति हुँदा उनीविरुद्ध आर्थिक अनियमितताको आरोपमा अख्तियार दुरुपयोग अनुसन्धान आयोगमा उजुरी नै पर्‍यो ।

विश्वविद्यालयमा उनीविरुद्ध आन्दोलन नै भएको थियो । अनियमितता भएको भन्दै विश्व विद्यालयमा विद्यार्थीहरुले २ महिनासम्म तालाबन्दी गरेका थिए ।