प्रधानमन्त्री सभामुखबीच भेटवार्ता, सिन्धुपाल्चोकमा बाडी पीडितलाई व्यवस्थापन गर्न ध्यानाकर्षण

खबर मेरो ४ बर्ष अगाडि

काठमाडाैं । सिन्धुपाल्चोकका बाडीपहिरो विस्थापितहरुका निम्ति स्थायी आवास निर्माण गर्नेबारे प्रधानमन्त्री केपी शर्मा ओली र सभामुख अग्नीप्रसाद सापकोटाबीच छलफल भएको छ । 

आज (शनिबार) बेलुकी प्रधानमन्त्री निवास बालुवाटारमा भएको भेटघाट कार्यक्रममा सिन्धुपाल्चोकमा बाडीपहिरोका कारण सर्वसाधारण घरबरविहीन बनेको भन्दै स्थायी आवासबारे छलफल भएको हो । 

सभामुख सपकोटाले सिन्धुपालचोकका पीडितलाई स्थायी आवास बनाएर स्थानान्त्रण गर्न आग्रह गरेका हुन् ।

सभामुख सचिवालयका अनुसार भेटमा सापकोटाले जोखिममा परेका बस्तीहरूको भौगर्भिक अध्ययन गर्न टोली पठाउने, विस्थापितहरूको स्थानान्तरणसहित स्थायी बसोवासका लागि एकीकृत मोडेल बनाउने, अरनिको राजमार्ग व्यवस्थित गर्ने र जुरे पहिरोपीडितका लागि जनस्तरबाट संकलित  रकम निकासा गर्नेलगायतका विषय उल्लेख गरेका छन् । 

जवाफमा ओलीले विपत्तिबाट सिन्धुपाल्चोकमा भएको जनधनको क्षतिका विषयमा आफ्नो गम्भीर ध्यानाकर्षण भएको उल्लेख गर्दै सम्बन्धित कार्यहरू यथाशीघ्र अघि बढाउने बताएका थिए ।

३० साउनमा लिदी पहिरोबाट विस्थापित तथा जोखिममा रहेका घरपरिवारलाई जुगल गाउँपालिका– १ बाँसखर्कमा अस्थायी बसोवासको व्यवस्था मिलाइएको छ । १० भदौमा सभामुख सापकोटाले बाँसखर्क पुगेर अस्थायी बसोवासका लागि आएका लिदीवासीलाई सोलार, भाँडाकुँडा, लत्ताकपडा एवं सरसफाइका सामग्रीहरू हस्तान्तरण गरेका थिए ।