नेकपा काभ्रेका प्रभावशाली नेता हीरा लामा नेपाली कांग्रेस प्रवेश, देउवाले गरे स्वागत

खबर मेरो ३ बर्ष अगाडि

काठमाडौं । सत्तारुढ दल नेपाल कम्युनिष्ट पार्टी (नेकपा) काभ्रेका प्रभावशाली नेता हीरा लामा घिसिङ नेपाली कांग्रेस प्रवेश गरेका छन् । 

नेकपाका नेता तथा पूर्व सूचना तथा सञ्चार प्रविधिमन्त्री गोकुल बास्कोटाका विश्वासपात्र मानिने हीरा कम्युनिष्ट पार्टीबाट जनताको हीत र भलो हुन नसकेको भन्दै नेपाली कांग्रेस प्रवेश गरेका हुन् । 

३८औं वीपी कोइराला स्मृति दिवसका अवसरमा घिसिङ केही युवाहरूसहित कांग्रेसमा प्रवेश गरेको काभ्रे कांग्रेसका तरुण नेता गुमानसिंह लामाले जानकारी दिए ।

नेकपा परित्याग गरेका घिसिङसहितका नेताहरू तथा कार्यकर्ताहरूलाई कांग्रेस सभापति शेरबहादुर देउवाले काठमाडौंको बुढानिलकण्ठमा मंगलबार आयोजित विशेष कार्यक्रममा पार्टी प्रवेश गराएका हुन् । देउवाले घिसिङसहितका नेताहरूलाई पार्टीको सदस्यता दिएका छन् ।

सभापति देउवाले कांग्रेस प्रवेश गरेका सबैलाई योग्यता र क्षमताका आधारमा पार्टीमा जिम्मेवारी दिइने बताए । उनले कांग्रेसलाई बलियो बनाएर देश र जनताको विकास गर्नुपर्ने उल्लेख गरेको युवा नेता लामाले जानकारी दिए ।

घिसिङ ०४६ सालदेखि वामपन्थी बिचारमा अबद्ध हुँदै आएका थिए । ०५४ सालको स्थानीय निर्वाचनमा तत्कालीन नेकपा (एमाले)बाट घिसिङ साबिक मेच्छे गाउँ विकास समितिको वडा नं. ६ मा वडाध्यक्षमा निर्वाचित भएका थिए ।

नेकपा छाडेर कांग्रेस प्रवेश गरेका घिसिङले कम्युनिष्ट पार्टीबाट जनताले आकांक्षा गरेका कार्यहरू पूरा हुन नसकेको बताए । उनले कम्युनिष्टहरूका कारण मुलुकमा बेथिति भएको भन्दै देश र जनताका लागि आफू लोकतान्त्रिक पद्धतिको विचार र विधिलाई अंगाल्न कांग्रेस पार्टी प्रवेश गरेको बताए ।