देशभरका आधा बढी जिल्लामा निषेधाज्ञा, कुन कुन जिल्ला हुन ?

खबर मेरो ३ बर्ष अगाडि

काठमाडौं । सरकारले लकडाउन खोल्ने निर्णय गरेपनि कोरोना भाइरस (कोभिड-१९)को जोखिम बढ्दै गएको भन्दै लकडाउनबारे निर्णय गर्ने नगर्नेबारे निर्णय गर्ने जिम्मा प्रमुख जिल्ला अधिकारीलाई दिएको छ । 

१२० दिने लकडाउन हटाउने निर्णय गरेको सरकारले ५ साउनको मन्त्रिपरिषद् बैठकले लकडाउनबारे निर्णय गर्ने जिम्मा सिडिओलाई निर्णय गर्ने अधिकार दिएको हो ।

सरकारले दिएको त्यही अधिकार प्रयोग गरेर ४० वटा जिल्ला प्रशासन कार्यालय (जिप्रका) ले आंशिक तथा जिल्लाभरि निषेधाज्ञा वा सिल गर्ने निर्देशन दिएको छ । देशभरि कोभिड-१९ संक्रमितको संख्या बढ्दै गएपछि जिप्रका र स्थानीय सरकारहरूले अत्यावश्यक बाहेकका सेवा बन्द गर्ने निर्णय गरिरहेका छन् ।

२० साउनमा जिप्रका, सप्तरीबाट सुरुभएको निषेधाज्ञा ३२ साउनमा गोरखा पुगेको छ । अधिकांश जिप्रकाले निषेधाज्ञाको अवधि तोकेका छन् भने केहीले अनिश्चितकालीन निषेधाज्ञा जारी गरेका छन् ।

सप्तरी, धनुषा, नुवाकोट, बाँके, महोत्तरी, सुनसरी, सर्लाही, स्याङ्जा, सिरहा, बर्दिया, बझाङ, मोरङ, दार्चुला, झापा, कञ्चनपुर, काठमाडौं, ललितपुर, भक्तपुर, रौतहट, रुपन्देही, कैलाली, मकवानपुर, कपिलवस्तु, धादिङ, रुकुम पश्चिम, धनकुटा, तनहुँ, उदयपुर, सुर्खेत, चितवन, नवलपरासी पश्चिम, सिन्धुपाल्चोक, बाग्लुङ र गोरखा जिप्रकाले अवधि तोकेर निषेधाज्ञा जारी गरेका छन् ।

बारा, पर्सा, जुम्ला, पाल्पा र रामेछापले अर्को आदेश नहुँदासम्मका लागि निषेधाज्ञा/सिल गरेका छन् । जिप्रका, पाल्पाले तानसेन नगरपालिका र जिप्रका रामेछापले रामेछाप नगरपालिका अर्को निर्णय नहुँदासम्मका लागि सिल गरेको छ ।